über mi

Müglicherwys merkt mes, ig bi im Bärnbiet ufgwachse u ha das Bärndütsch haut unerchant gärn. Wes itz tatsächlich öpper sött gäh, wo öppis nid verschteit, de cha me das ga guuugle oder no besser, dir fraget grad bi mir nache.

Villech geits angerne Lüüt glich wie mir, me tuet chli öppis ufeme Papiirfötzeli chribele, färbele u plötzlech düecht eim das no schön. De probiert mes e chli mit zeichne u de gseht das afe veiechli nach öppis us.

De macht me ume öppis angers. Me geit zum Bischpiu mit em Hundeli uf es gmüetlichs Spaziergängli…..

Oder me geit chli ga schpringe…….

U plötzlech schänkt eim d´Frou e Chaschte mit wunderschöne Pastellfarbe.

U nacheme 3- tägige Grundkurs im 2019, hetts mir de dr Ermu z‘grächtem inegno. De geits aber de richtig los, natürlech bruuchts de viu meh Farbe u verschiedeni Chride u es wird so richtig schön farbig.

Ig hoffe, mini Biuder mache Öich öppe glichviu Fröid wie mir u i chönn Öich dermit es Lächle ids Gsicht zoubere. Wär weiss, villech schadet sone Farbschprutz i üsere,mängisch trischte Wäut, grad gar nüt.